اخي الكريم
غريب ان تواجه صعوبة بالسعودية للزواج اكتر من سورية خاصة وانك متل ماقلت بالنسبة لاهل سورية صعب يعطوك بناتن
هون بالغربة وبحكم اغترابي كل ماسبق من عمري
الناس ماعاد عندها تفرقة بين المناطق السورية الكل بنظرهم سوري والكل متحابين واغلب الناس بتعطي طالما الشب ابن حلال حتى ولو كان مو سوري
وشي تاني هنن حريصين عبناتن الي تربو بطريقة وتفكير صعب عليهن يروحو او يتزوجو من حدا ساكن بسورية
وحرصن عبناتن انو طبعا الشباب رح يكونو اقل مما ازى عايشين جوا البلد وفرصة زواج بناتن يعني اقل ولهيك البنات هون سن الزواج اكبر من سن الزواج بالبلد
وبالغربة وجود اهل البنت واعيشتها بنفس بلدك افضل من انو تاخد وحدة من داخل سورية لانو(احتمال ماتتاقلم مع وضع الغربة وطريقة عيشة البنات هون وتاني شي اهلها رح يهلكوك طلبات وتالت شي صعوبة بعد البنت عن اهلها وتكلفة وديني كل فترة لعند اهلي
السعودية مليانة بالسوريين يمكن لسا مابتعرف ناس كتير ومااجى نصيبك وازى اجى النصيب رح تجي البنت الي الله كاتبها لعندك وبكل سهولة
وقت الخطبنا لاخوي هيك قالولنا الناس بحكم صعوبة طلبات اخوي والصعوبة لامي بالتنقل والبحث والحمد لله من اول بنت وفقنا الله
انت لو كنت بالرياض او جدة وغيرها حفلات وتجمعات السوريين كتييييير خاصة مع الاحداث والحفلات لدعم الاحداث وثوار سورية روح عشي حفلة ومااكتر السوريين الي رح تصادفهم اخترلك رجال كبير ومحترم واعرض عليه مساعدتك ومارح تلاقي الا كل خير
او عندك اسلوب تاني
بحكم الغربة الي احيانا بتكون دائمة هون للمغتربين بتلاقي كتير سوريين الهن تجمعات مع بعض للتواصل واكيد الهن شي رجال كبير اما شيخ او اي رجال بيختاروه لتدبير شؤونهم انت اسال واذا لاقيته رح يدلك عبنات وخاصة انو بيكون على معرفة باهل البنت

اخيرا توكل على الله ولا تستعجل نصيبك واستغربت عدم وضعك لشروط يمكن البنت بنت حلال بس ماتعجبك مواصفاتا او ماتتوافق معك فبعض الشروط مهمة للبحث عن فتاة هناك الرجال الي بيحب المنفتحة الفرفوشة وبعضهم لا بيحب الخجولة المطيعة......)
وتذكر انو البنت بتحب الرجال يخطب لنفسو وبتحترمو لانو اخدها بجهدو وعلى ذوقو وبدون ضغط اهلو اما الخطبة عن طريق النت ومواقع الزواج ابتعد عنها لااااااحاجة فيها

والشي التاني بالنسبة لشروط الاهل فلكل اهل وبنت شروط الذي عجبو اهلا وسهلا والي ماعجبو في غيرو
احيانا بتكون الشروط مو سلبية مثلا ذكرت الجامعة انا اول وحدة بتشترط الجامعة كون البنت جامعية وفرص عملها اكتر ويمكن دخلها اكتر اكيد مارح تتوافق الا مع الجامعي لانو المراة اذا تركت لها مساحة اعلى من الرجل من طبعها تفقد احترامو وتسيطر عليه
مابتهم شروط اهل العروس المهم مين بتناسبك وبدون مصاعب
وفقك الله وسدد اختيارك