حكايا شامية وبالهجة الشامية

حكايا شامية بالشامي

كان في واحد رجال عندو بنتين .. وعايش هو ومرته ، والحمد الله ماشي الحال ..
وفي يوم من الأيام اجا نصيب البنتين ، وفرح فيهن وسافروا لبلاد بعيدة
المرا قالت لجوزها : يارجال .. روح شوف هالبنات شو صار فيهن
بردوا ، عطشوا ، جاعوا .. الله أعلم فيهن ، خلينا نساعدهن
هالرجال سمع كلمة مرتو وسافر لعند البنت الأولانية
قال لها : كيفك ، كيف حالك
إن شاء الله ماشي الحال ؟
قالت له : الحمد الله نحنا عم نزرع هالأرض ونعيش منها من حليباتها ولبناتها وجاجاتها .. لكن أذا أجت سنة محل ، لاسمح الله والناس جاعت والسما ما امطرت ، متنا من الجوع ، الله يلطف يا أبي ..
خلي أمي تدعيلنا دائماً بالمطر و البرق والرعد والرياح والعواصف حتى نعيش ..
قام هالرجال راح لعند البنت التانية .. البنت التانية ساكنة جنب الطاحون .. جوزها عم يطحن هالقمح بها الطاحون
والطاحونة طاحونته والحمد لله ماشي الحال ..
قال لها : كيفك ، كيف حالك .. إن شاء الله ماشي الحال ؟
قالت له: إذا كانت الدنيا صاحية مافي أحلى منها لكن بالشتا والرعد والبرق و المطر ابينبلوا القمحات .. وبنخاف عالطاحونة يصرلها شي .. خلي أمي تدعيلنا دائماً بالنهار الصاحي ..
قام هالرجال رجع لعند مرته ..
وقلها : إذا الدنيا صيف وصاحية ابكي يامرا
وإذا شتت كمان ابكي يامرا ...