فقدتك يوم كلا" مع احبابه

فقدتك يوم كلا" مع احبابه
وانا مثل اليتيم اللي هموم القلب يخفيها
اشوف الناس مبسوطه وكلن حوله اصحابه
وانا ماني بحاسدها عسى ربي يهنيها
<اجامل من يناظرني بضحكة سن كذابه
واحاول امسح ادموعي بكف اليد وامحيها>
انا ماني طردت الهم وهو اليوم وش جابه
انا ماقلت يانفسي هموم الوقت خليها
وش اللي اتعبه قلبي وهمي من فتح بابه
احاول ادفن العبره لكن الوقت يبديها
انا لو كان بيديني نسيت الهم واسبابه
نسيت السالفه لكن تجي لامر طاريها
ذكرت الله وقمت اقرأ على نفسي من كتابه وقمت العن شياطيني واقول الله يخزيها
{تمشيني ظروف الوقت والاقدار غلابه
وانا مجبور اهونها على نفسي واهديها}
اظن الغالي لو يبكي على غاليه ماعابه وانا لامن بكت عيني بكت من فقد غاليها
اببكي ياعسى دموعي تلهيني عن اغيابه
هلا بالدمع مادامه هموم القلب ينهيها
احس الكون بي ضايق لو انه ماوسع اقطابه
واحس اني مللت العيش بالدنيا ولا ابغيها
انا لو ماخشيت الله ولا فكرت باحسابه
لااريح نفسي بنفسي من الدنيا ومافيها
|لك الله ماشكى قلبي لو ان الهم ماصابه
على الله يالظروف اللي تباغتني بلاويها
عسى ربي يعين اللي فقد من همه اعصابه
تذكرته وانا نفسي لهيب الشوق يكويها]