الأستاذ مظلوم ومراته الست مزعجة
بالصدفة طبيت على موضوع طريف
هو طويل شوية بس يستاهل انقله لمنتدى القصة والرواية
وذلك بمناسبة أعياد الوحدة اليمنية يوم 22 مايو التاريخي
وهي باللهجة المصرية المحببة ككل اللهجات العربية عموما عشان ما حدش يزعل
الاقتباس منقول وبدون أسماء حفاظا على حقوق الناقل والمنقول منه حفظه الله
يقول الكاتب
بادئ ذي بدئ نحب ننوه إن أحداث القصة دي حصلت في الواقع
وبتحصل في معظم البيوت.
و أي تشابه في الأسماء هو غير مقصود وحتى لو مقصود إحنا مالنا بقة
أيضا نقدم جزيل الشكر لجهاز المخابرات و جهاز المدرعات و جهاز اللاب توب
اللي ساعدوني على كتابة هذه القصص القصيرة
وبالطبع شكر خاص لأبطال المواقف القصصية
وهما الست مزعجة و الأستاذ مظلوم
ولا ننسى كمان القارئ اللي هيطلع عينيه معانا
خلينا نبدأ بالأستاذ مظلوم..إسمو غريب , صح؟؟
هو الصراحة كان إسم على مسمى و اللي سماه كده كان عنده حق
كانت الدنيا دايما كلها ضدوا والظروف مش مواتية وكانت ليه في كل خرابة عفريت
تحس إنه جر شكل و وشو وحش في كل حاجة
حياتوا كلها تحس إنها زي صفر المونديال
وحتى هوة لو مش مظلوم ولو حصل مثلا إن الدنيا مشيا معاه شوية وجاية على هواه
هيبقى حاسس بالظلم وإن الناس كلها واقفة ضده
معلش الراجل معزور من كتر اللي شافه مش حاسس الفرق بين الوحش والحلو
طب نكمل كلامنا عن الأستاذ مظلوم بعدين
وخلينا منفوتش الموقف ده بين الأستاذ مظلوم ومراته الست مزعجة
المشهد الأول
المكان:
بيت الست مزعجة والأستاذ مظلوم طبعا
واخدين بالكوا ليدز فيرست وتحديدا في الليفنج رووم
الزمان:
ليلة أول يوم من رمضان بعد إعلان الرؤيا
الأستاذ مظلوم قاعد على الكنبة المشمشي الموديرن الأمريكان إستايل
اللي مراته خليتوا يجيبها من إيمة شهرين كده غصبن عنه بحوالي تلتاشر ألف جنيه
من المحل الأمريكاني الجديد اللي ف سيتي ستارز
أصلها كانت غيرانة من مرات الدكتور علوي اللي في الشقة اللي قدامهم
و هوة من ساعتها وهو راقد ع الكنبة بيحاول يحلل تمنها شوية
لدرجة إنه خد أجازة عشان يفضل قاعد ع الكنبة وقرب يترفد من كتر الأجازات اللي خدها
وتقريبا هتجيلوا قرحة الفراش من كتر القعدة ع الكنبة
الست مزعجة شغالة في المطبخ بقالها حوالي خمسة وتلاتين ساعة
بتجهز أكل العزومة للجيش التاني الميداني اللي عزماهم أول يوم ف رمضان
وطبعا بتطبخ اللحمة المفرومة واللحمة المشوية واللحمة المسلوقة واللحمة الباردة وصينية البطاطس باللحمة
وصينية الكوسة بالبشميل و باللحمة وصينية اللحمة بالبيض وتسبيكة المكرونة باللحمة المفرومة
عاملة كل أنواع اللحمة.. تقريبا عازمة يأجوج و مأجوج على الفطار
مزعجة طلعت من المطبخ أخيرا وكأنها طلعة من تحت أنقاد عمارة مدينة نصر اللي وقعت في الزلزال
وداخلة بهبو الطبيخ على مظلوم في الصالة و هوة بيتفرج ع التلفزيون
مزعجة: إنت بتعمل إيه يا أخويا؟؟
مظلوم: قاعد بذاكر كيميا.. هكون بعمل إيه يعني , ما إنتي شايفاني يا ولية بتفرج ع الأخبار
مزعجة: كل ما أسألك سؤال بتتفتح فيا..وبعدين الأخبار دي مبتخلصش؟؟
إنت كل شوية عمال تشوف العراق وفلسطين والبوسنة والناس اللي بتموت هنا وهناك
يا شيخ روح حارب أحسن ما أنت قاعد كده زي قرد قطع
مظلوم في قرارة نفسه: يا ريت ع الأقل أموت شهيد وأخلص من نقك الدكر طول الليل والنهار
أنا مش عارف عقلي كان فين يوم أما إنطسيت في نظري وروحت إتقدمت لك..معلش ذنوب بنخلصها
مزعجة : يا أخويا قوم شوفلك حاجة مفيدة تعملها ولا حتى ساعدني في الشغل المكركب فوق دماغي ده؟؟
مظلوم: مهو إنتي اللي مكركبة الدنيا فوق دماغك وعازمة اللي عارفينوا واللي منعرفوش
بزمتك إيه لازمة إنك تعزمي الست الخياطة اللي على ناصية الشارع
وجارتنا الزنانة اللي ف الدور التالت اللي جوزها طلقها خمسين مرة من كتر رغيها
و بعدين أنا مش قشرتلك شوال البطاطس وقفص الخيار والطماطم اللي بتطبخي بيهم
عاوزة ايه تاني مني يا مزعجة؟؟
سدأ أبوكي إنو سماكي كده..هية دي الحاجة الوحيدة العدلة اللي عملها ف حياتوا ربنا يرحموا
مزعجة: متجيبش سيرة أبويا الله يرحمو وبعدين إنت نستني , عاوزين نكلم مدام نحمدوا زميلة عمري
والأستاذ خليل جوزها نباركلهم بمناسبة رمضان ونعزمهم ع العزومة بتاعة بكرة
مظلوم: إحنا مش كلمناهم إمبارح وقولنالهم كل سنة وأنتو طيبين وعزمناهم كمان
مزعجة: عارفة إن إحنا كلمناهم إمبارح بس ده كان قبل أما يعلنوا إن بكرة رمضان
مظلوم: هتفرق يعني يا مزعجة؟
مزعجة: زيادة الخير خيرين يا راجل
مظلوم: حرام عليكي أنا بيتي هيتخرب فاتورة التليفون بتاعة التلت شهور اللي فاتوا كانت ألف وربعوميت جنيه
ولسة مستدهومش دا غير أقساط الكنبة اللي لسة بسدد فيها
مزعجة: معلش يا أخويا ربنا يخليك لينا
مظلوم: حاضر يا مزعجة ..أمري لله..بس إعملي حسابك إن إحنا هنكلمهم كلمتين و بس
مكالمة كده من بتوع التلاتين ثانية بتاعة جورج قرداحي ف من سيربح المليون
كفاية مكالمة الساعتين وربع بتاعة إمبارح
قام جاب التليفون طبعا غصبن عنه وإتصل بيهم
كان نفسو ميرودوش لكن للأسف
مظلوم: ألو...سلام عليكم
خليل: وعليكم السلام..إستاذ مظلوم إزي حضرتك؟ عامل إيه؟
مظلوم: انا كويس الحمد لله..كل عام و أنتم بخير
خليل: وإنت بالصحة والسلامة يا حبيبنا..ربنا يبارك فيك وأخبار الأسرة إيه؟؟
مظلوم: كويسين الحمد لله. المدام عاوزة تكلم ست نحمدوا
خليل: آه طبعا أوي أوي
مظلوم ناول مزعجة السماعة و كأنه بيسلمها كفنو
مزعجة: ألووووو..نحمدو؟
نحمدو : ألوووووووو..أيوة يا حبيبتي..إزيك يا حبيبة قلبي؟
مزعجة: أنا كويسة الحمد لله..و إنتي عاملة إيه و إيه أخبارك؟
نحمدو: أنا عاملة بامية..هههههههههه
مزعجة: هههههههه..دمك شربات دايما يا حبيبتي دايما بتخففي عني مشاكلي
نحمدو: و إنتي عاملة إيه إنهاردة؟؟
مزعجة: أنا كويسة يا روحي بس صوابع رجلي تعبانين شوية
وظهري بينأح علية من كترالوقفة على حيلي من كتر الطبيخ وأنا بجهز العزومة
نحمدو: طب تحبي آجي أساعدك يا حبيبتي
مزعجة: تسلميلي يا غالية
نحمدو: أنا والله بتكلم بجد
مزعجة: ربنا يخليكي لية..ميرسي يا عيوني
نحمدو: طب هوة في حد بيساعدك؟؟
مزعجة: مفيش حد طبعا دا حتى مظلوم شايل إيدو خالص من شغل البيت
إنتي عارفة بقة رجالة اليومين دول عايشين في دور سي السيد.. كركركركركر..ههههههههههه
نحمدو: كركركركركر...ههههههه
لمدة دقيقتين كهكهة متواصلة
مزعجة: ربنا يخليكي يا حبيبتي خليتيني أفوق شوية
نحمدو: هو إنتي عاملة أصناف أكل إيه يا حبيبتي عشان لو حاجة ناقصة ممكن أكملهالك
مزعجة: ياه يا نحمدو دا موضوع يطول شرحه
نحمدو: وإحنا ورانا إيه يعني يا مزعجة..خلينا نسلي وقتنا
مزعجة: بوصي , أنا عاملة الأصناف كلها مفاجئة بس أنا عندي مشكلة بسيطة
انا مش عارفة أعمل صينية البامية بالبشاميل واللحمة المفرومة
أصلي معملتهاش قبل كده وخايفة أعملها تطلع وحشة
ممكن توصيفيلي بالتفاصيل وحدة وحدة طريقة العمل؟؟
نحمدو: من عيني يا عيني
مزعجة: تسلم عيونك يا غالية..بس ثانية واحدة هروح أوطي على المكرونة وآجي
خليكي ع الخط يا نحمدو
راحت توطي ع المكرونة و رجعت على مهلها بعد عشر دقايق تقريبا
ومظلوم ضغطه بقى 140\100 وقام ياخد حباية الضغط..
وهوة عمال يبرطم و يقول "يا مين يطولني على زرار الآندوو عشان أرجع حياتي كلها ومكنتش أتجوز من الأول..آه
على رأي المثل ساعة القدر يعمى البصر
يعني مينفعشي مثلا وهية واقفة ف المطبخ كده تدوخ شوية فتقوم واقعة ع البوتاجاز وهو شغال كده ويبقى قضاء وقدر
ولا مثلا وهية ف السوق يوقع عليها شهاب أو نيزك من السما
حاجة كده من بتوع فيلم مارس أتتاك..آه..آه يا بلد
رجعت مزعجة من المطبخ وفي وشها حماس الشباب بتوع تصفيات كاس العالم 2010
وقعدت ترغي وتنم في التليفون مع نحمدو وخلصت المكالمة قبل السحور بشوية يدوبك
ومظلوم قعد طول الليل يحسبها
كل سنه ويمننا الحبيب في حب ووئام ووحدة ما يغلبها غلاب في ظل قائدنا حفظه الله
