فيصل: الحمدلله ..
فارس: جاهزين ؟
فيصل: اي جاهزين .. انت وين ؟
فارس: عطني دقيقتين واكون عند بيتكم ..
فيصل: زين ..
سكر فيصل وهو طاير من الوناسه ..
فيصل: يلا عبود .. فارس قريب .. سحب عبدالله من يده وركض عند الباب .. لحقتهم مناف نعال عبدالله في يدها
مناف: لحظه فيصل .. خذ نعال عبود ..
اول ما طلعت عند الباب الا تشوف فارس فالسياره و هو مبتسم .. شيلتها كانت على كتفها .. انتبهت وبسرعه تحجبت ونادت على عبدالله يبدل نعاله ..
طلعت ام مناف عند الباب تكلم فارس .. ومناف كانت واقفه ورا الباب منحرجه من اللي صار ..
ام مناف: شحالك يبه فارس ؟
فارس: الحمدلله .. انتوا شو علومكم ..
ام مناف: الحمدلله يبه .. جزاك الله خير يا ولد الاجاويد ..
فارس: ولو الغاليه .. فيصل وعبدالله اخواني .. وانتي امي ..
مناف" وانا ؟"
فارس" ومناف حياتي"
ام مناف: يعطيك العافيه يبه .. بس متى بترجع ؟
فارس: يعني الساعه 8 ونص او 9
ام مناف: زين يبه ما وصيك عليهم .. ولو غلطوا ادبهم .. انت حسبة اخوهم الكبير ..
فارس: ان شاء الله الغاليه .. ماعتقد انهم بيغلطون .. دام انتي امهم ..
ام مناف: من طيب اصلك يبه .. نادت على فيصل .. فيصل يبه ..
فيصل: نعم يمه ..
ام مناف: عن الحركه الزايده زين ..
فيصل: ان شاء الله ..
فارس: يلا يمه .. احنا رايحين الحين .. تامرونا على شي من هناك .. قاصركم شي ؟
ام مناف: لا يبه .. تحملوا بروحكم ..
مشى فارس وركب السياره كان فيصل قاعد جنبه وعبدالله قاعد ورا فيصل .. التفت فارس على عبدالله ..
فارس: عبدالله تعال اقعد جدام معانا ..
عبدالله رفع راسه: زين ..
ركب معاهم جدام والتفت على فارس وابتسم له .. طالعه فارس وبادله نفس الابتسامه ومسح على راسه ..
فيصل: عبود ضحكت ..
فارس: ليش ؟
فيصل: هو كله زعلان ..
فارس: ما لازم نزعل هالكثر .. لازم نضحك صح عبدالله ..
عبدالله: قولي عبود ..
فارس ضحك: ههههه .. ولا يهمك عبود ..
عبدالله ضحك: اي جي احلى ..
حرك فارس من فريجهم وهو طالع على الشارع التفت صوب فيصل وعبدالله وانتبه على ثيابهم ونعلهم .. كسروا خاطره ..
فارس" اول ما نوصل المجمع ببدل لهم ملابسهم ان شاء الله .. مساكين فديتهم والله " .. كان يمشي بهدوء ويسولف مع فيصل وعبدالله ..
فيصل: فارس: انا وديت جوالي المدرسه ذاك اليوم .. والصبيان اقتهروا ..
فارس: ليش؟
فيصل: لانهم دوم يحروني ان عندهم جوالات وانا لا .. ويوم طلعت لي الجوال قلت لهم اني طلعت جوال ما صدقوني .. بس يوم وديته كلهم تموا يطالعوني .. لا جوالي بعد جديد مثلهم ..
فارس: يه عندك اياهم ..
فيصل: هههههه
فارس: زين يلا يا شباب وصلنا المجمع .. فيصل وعبدالله كانوا يطلون من الدريشه وهم منبهرين وكانوا متوترين اول مره بيدخلون مجمع .. نزل فارس وهم للحين فالسياره يطالعون المجمع من برا .. راح فارس صوب باب وفتحه .. مسك يد فيصل ونزله ومسك عبدالله ونزله .. مشوا جنب فيصل وهم يتلفتون حولهم ويشوفون الناس .. فارس كان ماسك يد عبدالله وفيصل يمشي محاذيهم .. قربوا عند الدري الكهربائي وخافوا منه واستغربوا ..
فارس مسك يد فيصل: يا شباب مافيه شي الدري .. اول ما تشوفون الخط الاصفر دوسوا عليه وبيمشي الدري ..
فيصل كان خايف اما عبدالله كان متمسك بفارس ..
فارس: زين شباب اول ما قول 3 كلنا نرفع ريولنا وندوس على الخط الاصفر .. اوكي ..
فيصل: اوكي ..
فارس: 1 , 2 , 3 .. كلهم رفعوا ريولهم وداسوا الخط الاصفر .. طالعهم فارس مبتسم .. خلصوا من الدري وعلى طول وداهم فارس محل ملابس اولاد .. فيصل وعبدالله كانوا يشوفون الملابس وهم مستغربين ..
فارس: زين شباب .. انتوا تختارون ولا انا اختار لكم ؟
فيصل: ها ..
فارس انكسر خاطره عليهم " صج انهم ما شافوا الدنيا .. مساكين والله " ..
فارس: زين انا بختار لكم .. اختار لفيصل بنطلون بيج لين تحت الركبه وركب عليه تي شيرت كحلي .. واختار له صندل بيج .. اما عبدالله خذ له بنطلون اسود وتي شيرت اصفر وجوتي اسود ..
فارس: يلا شباب دخلوا بدلوا ملابسكم ..
فيصل: زين .. تعال عبود البسك ..
فارس " وحليلهم " ..
دخلوا غرفة تبديل الملابس وكل واحد فيهم مستانس انه بيلبس شي جديد .. فارس كان بنتظرهم .. فيصل لبس اخوه وكانت الملابس مرتبه عليه .. طلع عبدالله وشافه فارس وابتسم له ..
فارس: حلاه على عبود لابس جديد ..
عبدالله كان مستحي ومنزل راسه ..
فارس: تعال شوف نفسك فالمرايه تعال يبه ..
عبدالله اول ما شاف نفسه استانس ..
عبدالله: الله .. يجنن .. روعه .. حضن فارس بقوه .. وفارس ما توقع ردة فعل عبدالله .. حضنه فارس وشاله ..
طلع فيصل اللي كان مستانس بس البنطلون وسيع عليه ..
فيصل: البنطلون وسيع وايد ..
فارس وهو شايل عبدالله: ولا يهمك .. نجيب لك مقاس اصغر .. طلب فارس من الشخص اللي يشتغل بالمحل انه يجيب مقاس اصغر لفيصل ولما قايسه طلع مظبوط عليه .. استانس فيصل وايد .. راح فارس عند الكاشير عشان يدفع .. خذ كلابسهم القديمه وحطها في كيس وطلعو وهم فرحانين ..
فارس: زين شباب تغديتوا ولا لأ ؟
عبدالله: لا ما تغدينا ..
فارس: يلا نروح ناكل بعدين نكمل مشوارنا زين ..
فيصل وعبدالله ان شاء الله ..
راحوا صوب المطاعم .. و كانوا منبهرين .. وفارس يطالعهم وقلبه معوره بس في نفس الوقت استانس لانه فرحهم ..
فارس: يا شباب هالقسم كامل للمطاعم .. خل نمشي ونشوف اللي بعجبكم ..
عبدالله أشر على مطعم يسوي المعكرونه ( الباستا )
عبدالله: انا ابي هاذي ..
فارس: ولا يهمك .. فيصل وانت شو في خاطرك ..
فيصل: باخذ نفس عبود ..
فارس: حلو .. طلب لهم كل واحد طبق وتموا ياكلون .. فارس توقعهم بياكون بسرعه او بهمجيه بس شاف العكس .. كانوا ياكلون بأذب وبهدوء ..
فيصل قرب صحنه: فارس تفضل ..
فارس: بالعافيه يبه .. انا متغدي ..
ابتسم له فيصل: عبود بسم الله ..
عبدالله: بسم الله ..
فارس " ماشاء الله عليهم .. سموا وكلوا بهدوء وادب .. والله عرفت تربي ام مناف .. الله يخليها لعيالها " ..
خلصوا الشباب .. وطلب لهم فارس ايس كريم وطلب له معاهم .. تموا هم الثلاثه يضحكون على بعض ..
فارس: كشخه شكلنا واحنا نلحس الايس كريم مثل اليهال ..
الكل: ههههههه
عبدالله: انا توني صغير .. انتوا اللي شكلكم يضحك ..
فارس: مصدق نفسك يالنونو ..
عبدالله: اي توني نونو ..
فيصل: مشكله الثقه فالنفس ..
الكل: هههههههه
بعد ما خلصوا راحوا يكملون مشوارهم .. وداهم فارس اكثر من محل وخذوا لهم ملابس وكانوا فرحانين فيها .. مروا عند محل مجوهرات .. لفت انتباه فارس عقد حلو على شكل فراش صغار حول بعض .. كان مرصع بالاحجار الكريمه الملونه .. دخل المحل وسأل عنه .. قرر ياخذه امناف .. بدون تردد خذه وطلع من الشباب راحوا صوب الالعاب .. ونسهم فالالعاب لي صدعوا من كثر اللعب .. كانت الساعه 8 بالضبط .. خلصوا كل مشاويرهم ولعبهم ..
فارس: ها شباب تبون شي ؟
عبدالله: ابي اخذ شنطه حق المدرسه .. اللي عندي قديمه وتشققت ..
فارس: من عيوني .. بنطلع من المجمع وبوديكم المكتبه اخذوا اللي تبونه ..
عبدالله نط من الوناسه: هي هي هي ..
فارس: وحليلك يا عبود .. التفت على فيصل اللي الابتسامه ما فارقت شفاهه .. ها فيصل في خاطرك شي ؟
فيصل: لا الحمدلله .. ما قصرت يا فارس ..
فارس: انتوا اخواني يا فيصل ..
فيصل: جزاك الله خير ..
فارس: الله يسلمك .. يلا شباب نروح المكتبه ..
عبدالله: يلا .. وراح يركض قبلهم .. ركبوا السياره ومروا المكتبه وكل منهم خذ له اغراض للمدرسه من دفاتر واقلام وعبدالله خذ له شنطه .. خلصوا من المكتبه ورجعوا البيت .. عبدالله نام فالسياره من التعب .. اما فيصل فكان مستانس ويسولف مع فارس .. فارس وايد حب فيصل وحب شخصيته .. وصلوا البيت الساعه 9 بالضبط ..
فارس: عبود نام فديته .. افتح الشنطه ونزل الاغراض وناد امك او اختك يشلون عبود ..
فيصل: ان شاء الله ..
دخل فيصل البيت ومناف استغربت منه ..
مناف: فيصل حبيبي .. شهالزين ..
فيصل مساك ملابسه: فارس شراها لي .. تعالي شلي عبود نام فالسياره ..
مناف طالعت اخوها بفرح: ان شاء .. راحت لبست عبايتها وطلعت وشافت فيصل داخل ومعاه اكياس وايد .. وشافت فارس واقف وشايل عبدالله .. تم يطالعها مبتسم ..
.............
