فارس ومحمد: اي ..
سلمان: الله يسلمكم هو جايب هاي كله من هناك ويبي يتخلص منه .. جابه عن طريق البحر .. لان هو يملك اسطول كبير للشحن .. الدناميت والاسلحه والمتفجرات .. انا عرفت المكان وخططت على بقعه في ذاك المكان نحفر فيها حفره عميقه ونحط المتفجرات والاسلحه .. ونحط الدناميت وندفن الحفره .. لما نرجع بكره مع الشباب نحفر في نفس المكان بس يادوب حفره ما تتعدى مترين .. و انا اللي بحفر .. اخاف على الشباب و كلكم في ذمتي .. بحفر الحفره وبحط فيها الاوراق اللي باخذها معاي من البيت .. وبحط دناميت خفيف بس جدام الشباب .. وبنفجر ان شاءالله ..
محمد: حلو كل شي تمام للحين .. بس من بيحفر الحفره اللي بنحط فيها المتفجرات والاسلحه ؟
سلمان: العمال اللي جاين مع الاسطول .. والمعدات اللي معاهم تكفي حق الحفره اللي نبيها ..
فارس: حلو .. دام كل شي متوفر ومرتب له احنا جاهزين .. متى نحرك ؟
سلمان: انا من الصبح مودي العمال والحين اتوقع انهم ينتظروني ..
فارس: ماشاءالله يعني اختصرت الوقت ..
محمد: ماشاءالله عليك ..
سلمان: لازم هاي متفجرات واسلحه مو لعبه .. بس احنا علينا الساعه 2 نحرك من هني نروح الميناء عشان نستلم الاغراض ونوديها البر .. و نوصل هناك قبل الغروب .. ونكمل باقي الشغل .. على فكره يا شباب احنا ما راح نسوي شي غير نشرف عليهم ..
محمد: مو مشكله نعين ونعاون ولا يهمك يا بوخليفه ..
سلمان: والله تحرجوني .. ما تقصرون
محمد: ولو .. الناس للناس ..
فارس: ترا الدنيا للحين فيها خير ..
سلمان: بوجود ريايل مثلكم والله انها بخير ..
فارس: ما عليك زود ..
محمد: زين متى نحرك عيل ؟
سلمان: نتغدى اول بعدين بنحرك .. الحين الساعه 1 ونص تقريبا .. 2 لازم نطلع من هني ..
فارس ومحمد: صار ..
سلمان قايم بيطلع: عيل خل اروح اشوفهم يجهزون لنا الغدا .. طلع من عندهم وهو فرحان ..
فارس: ما سوينا حساب غدا .. ما قلت لي يالشيخ
محمد: سلمان ما قال لي اصلا .. بس عيب نرده ..
فارس: ان شاءالله ..
دخل سلمان و رواه الدريول شايل صينية الاكل .. تغدوا الشباب وراحوا بعدها الميناء .. سلمان بسيارته وفارس مع ولد عمه .. وصلوا الميتاء ونزلوا وشافوا اسطول كبير واقف فالميناء ..
فارس: ماشاءالله كبير هالاسطول ..
سلمان: تشوف هالاسطول يا فارس .. كل شي يخطر على بالك يوصله ..
فارس: كيف ؟
سلمان: يعني ممكن معدات كبيره .. سياير .. اثاث .. حتى الملابس .. تشوف الكونتينرات البيض .. هاي كلها ملابس متنوعه .. هم يوقفون في محطات .. يعني يطلعون من هني يروحون بلاد ثانيه يوقفون ينزلون اغراض ويكملون دربهم ..
فارس: والله شغل عدل ..
محمد: اي والله .. الا بسألك بوخليفه ..
سلمان: هلا ..
محمد: يوسف وينه ؟
سلمان: صرفته اليوم ..
محمد: والله لاعبها صح يا بوخليفه .. ماشاءالله عليك ..
سلمان وفارس: ههههههههه ..
سلمان: لازم .. يوسف ماشاءالله عليه ذكي .. وماتطوف عليه .. قلت افتك من حنته واصرفه عشان اخذ راحتي..
حملوا الاغراض اللي كانت في كراتين كبيره .. وسلمان ترك سيارته فالميناء وركب سياره كبيره فيها الاغراض اما فارس و محمد حملوا معاهم المتفجرات .. اتجهوا للمنطقه اللي فيها الحفره .. ولما وصلوا فارس حس بالخوف .. و كان طول الوقت يتلفت حواليه .. العمال نزلوا الاغراض من السيارتين .. و سلمان شيك على الحفره وحجمها ..
فارس:وايد عميقه وضيقه ..
سلمان: احسن لان المتفجرات لما تنفجر بتوسع الحفره تحت الارض .. لو وسعناها يمكن يطير شي فوق ..
فارس: اها ..
كانت الساعه 4 ونص .. وسلمان و محمد وفارس يشرفون على العمال ..
محمد: زين ما تخاف على اي واحد من هالعمال يصير فيه شي .. ينفجر في ويهه شي ولا يتعور ..
سلمان بسخريه: عادي الا امريكي ..
الشباب: هههههههه ..
محمد: حرام والله ..
سلمان: استغفر الله العظيم .. ان شاءالله ما راح يصير لهم شي .. بعدين هذول تربية شوارع .. يعني لو واحد منهم انجرح او نكسر يستحمل .. شوف اجسامهم شلون معضله .. هناك في امريكا لو تشوفهم شلون يشتغلون تقول هذول مو طبيبعين .. يباشرون الشغل من الساعه 5 الفجر لين 8 فالليل ..
فارس: بل .. وين يشتغلون ؟
سلمان: اغلبهم يشتغلون في مناجم ..
محمد: مناجم شو ؟
سلمان: الفحم او الالماس او يحفرون آبار حق الماي .. يعني شغالين ولا يتعبون ..
محمد: صج انهم مو اوادم .. ماشاءالله ..
سلمان: انا طلبت من صاحبي يجيب لي كم واحد على الاسطول .. لو بجيب عمال من هني ما ضمنهم بصراحه ..
فارس: صح ..
سلمان: جاتهم الاوامر من هناك .. يشتغلون وهم ساكتين ..
محمد: الله يعينا ..
قرب احد العمال من سلمان ..
العامل: Sir, all done.
سلمان التفت عليه: Ok, ask the guys to collect the tools we shall go now.
العامل: You got it sir.
راح العامل وبلغ باقي العمال باللي طلبه منه سلمان .. جمعوا معداتهم وركبوا السياره .. ركب سلمان وركب معاه بعض العمال .. اما فارس ومحمد كانوا مع بعض .. وصلوا العاصمه الساعه 7 .. سلمان وصل العمال الميناء ..
سلمان: نتلاقى في بيتنا شباب .. يوسف بيكون هناك وباقي الشباب ..
فارس: صار يا بوخليفه ..
توجهوا الشباب لبيت يوسف .. ولقوا الكل متجمع .. خالد و عبدالعزيز و فاضل وعلي ويوسف ..
فارس: السلام عليكم ..
الكل: وعليكم السلام والرحمه ..
يوسف: هلا والله .. شتشربون يا شباب .. بارد ولا حار ..
محمد: انا ابي بارد ..
فارس: شاي احمر الله لا يهينك ..
يوسف: ان شاءالله ..
قلط يوسف فارس ومحمد .. شوي و دخل عليهم سلمان اللي كان مرهق وتعبان ..
سلمان رافع يده: السلام عليكم ..
الشباب: وعليكم السلام ..
سلمان التفت على خالد وابتسم: حيالله المعرس .. مبروك يا خالد ..
خالد: الله يحيك ويبارك فيك .. والفال لك وليوسف ..
سلمان: تسلم والله .. عيل دخلت القفص على قولتهم ..
خالد: ههههه .. اي خلاص دخلته ..
سلمان: الله يوفق لك ويستر عليك يا خالد ..
خالد: الله يسلمك الغالي ..
سلمان التف على يوسف: قلطت الشباب يبه ..
فارس: ما قصر والنعم فيه ..
يوسف مبتسم: الله ينعم بحالك بومحمد ..
فارس: انا بونايف ..
يوسف: ولا يهمك يا بونايف ..
فارس: الله يحيك ..
سلمان: المهم شباب .. خلونا نخلص امورنا ونتفق على بكره ..
كل الشباب انتبهوا لسلمان يسمعون له باهتمام ..
سلمان: بنطلع من العاصمه بعد صلاة الفجر .. الطريق تقريبا ساعتين .. انا مجهز الاغراض والدناميت .. بنحفر حفره يكون عمقها من متر الى مترين مو اكثر .. بنحط الاغراض اللي بنفجرها .. بس لازم نبتعد عن الدناميت مسافة 500 متر .. وعن الطيش يا شباب ..
فاضل: زين نبي نستعرض شوي ..
خالد: والله انك متفرغ ..
عبدالعزيز: ليش لأ .. عادي .. بعد ما نخلص تفجير ونستعرض واحنا راجعين العاصمه ..
سلمان: ماعتقد .. بس لو كل شي صار اوكي وخلصنا من وقت .. اخذوا راحتكم ..
عبدالعزيز: سلمان ممكن سؤال ؟
سلمان: تفضل يبه ..
عبدالعزيز: ليش بتودي الكيمرا وتصور التفجير ..
سلمان تلخبط: ها ..
فارس على طول غير الموضوع: زين جيبوا البانشيات حق الاستعراض ..
محمد: عزيز انت وفاضل ويوسف روحوا العزبه وجيبوهم الليله .. شيكوا عليهم وعبوهم بترول حق بكره ..
عبدالعزيز وفاضل مستناسين: حلاته البانشيات ..
يوسف: اي والله ..
سلمان: طالع فارس وابتسم ..
بعد ما خلصوا نقاشهم عن التفجير تكلم فارس ..
فارس: زين شباب شو رايكم نروح جماعه الشاليه او العزبه ..
محمد: متى ؟
فارس: نص الاسبوع ..
يوسف: عاد عندنا اشغال ..
خالد: اي بيكون عندنا اشغال ..
فارس: اجزوا شو فيها ..
علي: شو اللي طرى عليك ولد عمي ؟
فارس: والله الاهل ضايقين وقالوا يبون يغيرون جو .. قلت نروح كلنا العزبه او الشاليه جماعه نتونس ..
يوسف " فديت الاهل اللي ضايقين انا .. الله يفرج همها الغاليه " ..
علي: حلو .. نأجز مو غلط ..
عبدالعزيز: انا ماعندي مانع ..
سلمان: زين انتوا بتروحون مع اهلكم .. احنا شدخلنا ؟
محمد: عيب هالكلام يا بوخليفه .. كلنا اهل .. جيب البنات معاك .. البنات موجودين ..
يوسف: ليش لأ .. خل يغيرون جو ..
سلمان: حلو .. بشوفهم اذا ماعندهم التزامات ..
فارس: خلاص نرتب على الثلاثاء لين الجمعه ..
علي: والله شي .. بس وين بتروحون العزبه ولا الشاليه ؟
فارس: نشوف راي الاغلبيه ..
علي: انا افضل العزبه ..
فاضل: الشاليه ..
