في بيت بو فارس بعد ما رجعوا الشباب من بيت يوسف .. فارس تم فالسياره يكلم مناف .. اما عبد العزيز دخل ولقى خواته قاعدين ..
عبد العزيز: ما نمتوا ؟
فاطمه مبتسمه: لا للحين ..
مريم: شو سويتوا .. تأخرتوا
عبدالعزيز: قعدنا نسولف .. قعدتهم ما تنمل ..
فاطمه: فارس وين ؟
عبدالعزيز: فالسياره ..
فاطمه: اها ..
عبدالعزيز: في خاطري عصير ليمون دافي .. من الحلوه اللي بتسوي لي ؟
فاطمه ابتسمت: عيوني لك بوسعود ..
عبدالعزيز: جزاج الله خير اختي .. بس ببدل وبنزل لكم ..
طلع من الصاله وراح يبدل .. فاطمه دخلت المطبخ تسوي له العصير .. مريم وايمان اندمجوا مع التلفزيون .. فاطمه طلت من دريشة الصاله وشافت فارس وهو يتكلم فالتلفون .. كان فاصخ الغتره وحاطها على السيت الثاني ومرجع الكرسي على ورا ويتكلم وهو مغمض عيونه ومبتسم ..
فاطمه " آآه منك يا فارس .. من تكون هاذي اللي خذت قلبك وسوت بك جي .. ويا ترى شو مصيرك معاها؟" ..
تمت تتفكر في اخوها .. خلصت عصير الليمون .. خذته وراحت الصاله ..
فاطمه: ما جى عزيز ؟
مريم: لا للحين ..
دخل عليهم عبدالعزيز: هلا والله .. قعد جنب فاطمه .. فديت اختي والله .. وخذ الكوب وشرب العصير ..
فاطمه: حاضرين لك بوسعود ..
قعد عبدالعزيز وتابع معاهم الفلم .. اندمجوا مع الفلم كلهم .. خلص الفلم وعبدالعزيز نام على الكرسي من التعب
ايمان: بصراحه روعه الفلم ..
مريم: وايد حلو .. أثر فيني ..
فاطمه: شو رايك فيه عزيز .. ؟
ايمان: وووي نام فديته ..
التفتوا عليه مريم وفاطمه ..
مريم: فديته والله ..
ايمان: قعدوه عشان يروح ينام فوق ..
فاطمه: باقعده .. قربت منه .. عزيز .. عزيز ..
عبدالعزيز: همممممم ..
فاطمه: قوم فديتك نام في غرفتك ..
عبدالعزيز: عيزان .. شغلي لي مكيف غرفة الضيوف بنام هناك ..
فاطمه: زين فديتك ..
مريم: انا بروح اشغل المكيف ..
فاطمه: يلا عزيز قوم فديتك ..
قام وهو مغمض عيونه .. مسكت يده فاطمه ..
فاطمه: يلا فديتك ..
مشى معاها وراحوا غرفة الضيوف .. حذف نفسه على السرير .. لحفته وبندت الليت وطلعت .. مريم راحت تنام وايمان راحت قبلها .. فاطمه راحت صوب المطبخ .. طلت من الدريشه وفارس كان على نفس الحال ..
فاطمه " الله يهديه " ..
طلعت من المطبخ .. وراحت غرفتها .. فتحت صندوقها الصغير اللي تحتفظ فيه برسايل يوسف .. وطلعت آخر رساله .. قرتها وشمت ريحتها ونامت ..
اما فارس فكان يكلم مناف ولا حس بالوقت ولا غيره ..

بعد مرور اسبوع على الاحداث اللي عشناها في اخر جزئين .. في بيت يوسف .. سلمان قاعد مع هنادي ..
سلمان: هنوده يبه انتي مقتنعه ؟
هنادي: اي خالي ..
الجوهره: انتي استخرتي ؟
هنادي: اي الحمدلله .. بس ليش تقولون لي جي ؟ انتوا سامعين عن الريال شي ؟
سلمان ضحك: هههههه .. لا يبه مو هاي القصد .. بس مانبيج توافقين عشاني اعرفه .. لو انتي مو مقتنعه فيه وماصار نصيب بيظل هو صاحبي .. وهالموضوع ما راح يأثر على علاقتنا ببعض ..
هنادي: الحمدلله انا مقتنعه .. استخرت وارتحت ..
سلمان: خلاص عيل ارد على الريال ..
هنادي منزله راسها باحرج: اي ..
الجوهره: وااااي فديت اختي انا .. تستاهلين هنوووووود ..
هنادي حضنت الجوهره وصاحت ..
سلمان: ليش هالدموع يالغاليه ؟
هنادي: كان ودي امي وابوي يفرحون معانا ..
سلمان والجوهره سكتوا ونزلوا روسهم بحزن .. ساد الهدوء المكان فتره .. سلمان كسر حاجز الصمت ..
سلمان: عيل استقبلوا الحريم ..
الجوهره: ولا يهمك خالي ..
سلمان وهو طالع: بارك الله فيكم بناتي ..
طلع الحوش و ولع له زقاره .. كان يدخنها بشراهه ..
سلمان " آآآه يالدنيا .. ليش تسكرين بيبانج بويهي ليش ؟ آآه " .. طفى زقارته وركب السياره وطلع يتمشى فالشوارع .. اتصل بنواف ..
نواف: هلا والله
سلمان: هلا وغلا .. شحالك ؟
نواف: طيب الله يسلمك .. علومك ؟
سلمان: الحمدلله .. انت وين ؟
نواف: انا فالمكتب ..
سلمان: حد عندك ؟
نواف: لا والله بروحي ..
سلمان: جهز قهوتي جايك ..
نواف مبتسم: حياك الله ..
سلمان: سلام ..
نواف: عليكم السلام ..