هيا: اريامي ..
الريم: هلا عميه ..
هيا: وين سرحتي ؟
الريم: ولا مكان ..
الجده: شو اللي شاغل بالج ؟
الريم ولا شي يدتي ..
قامت عنهم بتطلع من الصاله ..
هيا: وين رايحه فديتج ؟
الريم: بروح الحمام عميمه ..
هيا: زين حبيبتي ..
ركضت الريم صوب الحمام .. دخلت وسكرت عليها الباب .. تنفست بسرعه وتمت تصيح .. حاولت انها تمسح دموعها بس كل ما تمسح تنزل دموع اكثر واكثر .. غطت ويها وتمت تشهق من الصياح .. راحت عند المغسله وغسلت ويها بالماي البارد .. عيونها صارحت حمر .. خافت تطلع ويسألونها .. تمت فتره فالحمام تلهي نفسها عشان ما تصيح .. القت نظره على نفسها فالمرايه .. تنفست بعمق طلعت الصاله عندهم .. لقتهم كلهم موجودين الا عمتها ..
الريم: يبه خل نمشي ..
الجد: وين تروحون ؟
الريم: يدي مصدعه من السوق ..
الجد: الله باليكم تطلعون من صباح الله خير ..
الجده: وش عليك منهم ..
الجد: هاذي البنت صدعت .. شو يسوى عليها ..
الجده: كيفهم كيفهم ..
بوفارس: خذ بنتك وحرك ..
بومحمد مبتسم: هههههه .. هاي اللي بسويه .. يلا الريم يبه ..
الريم: ان شاءالله ..
طلعوا مع بعض والريم ما كانت على بعضها .. بومحمد حس في بنته .. وهم فالسياره سألها ..
بومحمد: شو فيج فيدتج ؟
الريم: يبه مصدعه من الشمس .. ما كلت شي وراسي يدور ..
بومحمد: زين امر اخذ لج شاي الحين ؟
الريم: لا يبه .. ابي اروح البيت انسدح .. وبرتاح ان شاءالله ..
بومحمد: على هواج يبه ..
وصلوا البيت والريم كان ودها تطير على غرفتها مو تمشي لها .. سلمت على امها وراحت الغرفه وقفلت عليها الباب .. حذفت نفسها على السرير وتمت تصيح من خاطرها ..
الريم : ليش يا فارس ليش ؟ .. يعني ما حسيت بحبي .. والله اني اولى من الغريبه .. احبك يا فارس احبك .. آآآه ..
تمت تصيح بحزن المسكينه .. في هالاثناء فاطمه اتصلت بمريم تبشرها بهالخبر الحلو ..
مريم بوناسه: واااااو .. احلى خبر ..
فاطمه: بس تدرين مرايم ..
مريم: شو ؟
فاطمه: تمنيت مناف لفارس ..
مريم: اي وانا بعد .. يلا مافي نصيب .. بس دام فارس ترك قلبه يختار ما نقدر نوقف في دربه ..
فاطمه: اي والله ..
مريم: الا مناف شو اخبارها ؟
فاطمه: طيبه وتسلم عليج .. كلمتها من كم يوم ..
مريم: انا كلمتها يوم رجعت من السفر مره وحده بس ..
فاطمه: انا اتصل فيها مرتين او ثلاث مرات فالاسبوع ..
مريم: حليلها والله .. زين ومن تكون هالبنت اللي بغاها ؟
فاطمه: مادري .. بس قالي بنت فلان الفلاني .. سمعتي بهالاسم من قبل ؟
مريم: والله ما مرت علي بنت اسم ابوها بهالاسم .. و وين شايفها فارس ؟
فاطمه: يوقل فالمستشفى .. لما ترقد الجسمي ..
مريم: حليله والله ..
فاطمه: بس فارس امس يسولف معاي .. يقولي انه مو مرتاح لويه امي هاليومين ..
مريم باستغراب: ليش ؟
فاطمه: هو اصلا قال لامي من اسبوع .. احنا تونا ندري .. واعتقد ان امي سألت ويقول انه يشوف ويه امي متغير غير عن يوم لما قالها انه قرر يتزوج ..
مريم: شو بيغير امي يعني ؟
فاطمه: مادري ..
مريم: يعني انتي تعرفين امي .. لها نفس على الناس شوي .. نفس ايمانو ..
فاطمه: لا ماعتقد امي توقف في طريق حد فينا يا مريم .. وبعدين لو البنت ما كانت من مستوانا .. واصلا شو فيه مستوانا .. احنا مو اعلى من الناس .. ولا احنا اللي البلاد تحت يدنا .. الحمدلله احنا ناس عادين ..
مريم: فطوم حبيبتي .. انتي تقولين هالكلام .. بس غيرج يقول عكسه ..
فاطمه: من تقصدين ؟
مريم: يعني كلامي واضح .. شوفي امي من ربعها .. و شوفي ايمان اختي من ربعها ..
فاطمه: شدخل يعني ..
مريم: فطوم شو فيج اليوم ..
فاطمه: مافيني شي .. بس كلامج غريب ..
مريم: شو الغريب فيه ؟ اقولج امي ما ترافج اي حد .. امي متكبره على الناس .. على الرغم من طيبتها .. من ربع امي الا نسوان التجار والوزراء .. ايمانو ام كشه .. من ربعها .. بنات ربع امي .. عمرج سمعتي ان ايمان مرافجه غير هالبنات .. من يوم هي صغيره ما تعرف غيرهم ..
فاطمه: صح كلامج .. بس ماعتقد ان امي تفكر جي ..
مريم: بقولج شي بس في ذمتج يا فطيم ما يطلع ..
فاطمه عقدت حواجبها: شو .. قولي ..
مريم: لما تقدم لج يوسف .. سمعت امي تقول لابوي ما تمنيته لها ..
فاطمه بصدمه: ليش ؟
مريم: لان يوسف مستواه اقل من مستوانا .. بس ابوي قالها ان الولد مو بفلوسه باخلاقه .. شوفي ما انكر ان امي تحب يوسف وارتاحت له من اول مره شافته مع اخواني .. بس ما تمنته ياخذ وحده فينا ..
فاطمه دموعها نزلت على خدودها من الكلام ..
مريم: فطيم لا تزعلين من كلام امي .. بس شوفيها تحب يوسف وتعزه بمعزة اخواني ..
فاطمه تمسح دموعها: ما توقعت امي جي تترفع على الناس وشايفه نفسها .. يعني احنا عندنا خير والحمدلله .. بس شدخل ان لازم ناخذ واحد راهي ولا راعي حلال ..
مريم: عاد هاي تفكير امي .. لانها تربت على هالشي .. تذكرين بابا شو قالنا مره ..
فاطمه: عن ؟
مريم: يوم قالنا انه كان موظف فالوزاره .. وامي هي اللي شجعته انه يكمل دراسته ويمسك منصب وبعدين تقاعد ويجابل حلاله بنفسه .. ونفس الشي سوته مع فارس اخوي ..
فاطمه: انا ما انكر ان امي لها افضال علينا بس الله يهديها شلون تتكبر على الناس ..
مريم: الله يهديها ان شاءالله .. بس صدقيني انها تحب يوسف وايد .. حتى اكثر من خالد ..
فاطمه: صدمتيني يا مرايم ..
مريم: تتوقعين قلبة ويه امي لان البنت عاديه ؟
فاطمه بعصبيه: شو تبي بعد .. تبي فارس ياخذ بنت امير ولا تاجر ولا شو ..
مريم: شو فيج تنرفزتي الحين .. لا تخلين اتحسف اني قلت لج ..
فاطمه: والله غصبن عني ..
مريم: هونيها وتهون . وادعي لفارس ..
فاطمه: اله يوفق له ان شاءالله ..
مريم: زين انا بروح خالد يناديني ..
فاطمه: زين .. سلمي عليه ..
مريم: ان شاءالله .. مع السلامه ..
فاطمه: مع السلامه ..
سكرت وراحت عند الباب تستقبل خالد .. مع انها مستغربه انه بيرجع هالوقت .. لان كانت الساعه 12 ونص .. وخالد يرجع الساعه 2 من المكتب ..
مريم: هلا حبيبي ..
فتحت الباب وما لقت حد .. عقدت حواجبها مستغربه ..
مريم " يه وين راح خالد ؟ .. خل انزل اشوفه يمكن نزل " ..
نزلت الصاله ومالقت حد الا ساره وعيالها فالصاله .. شافت الخدامه فالممر وسألتها ..
مريم: خالد رجع ؟
الخدامه: لا مدام .. يجي الساعه 2 ..
مريم باستغراب: زين ..
راحت غرفتها وهي تفكر في الاشياء اللي تصير لها .. اتصلت بخالد تطمن عليه ..
خالد مبتسم: هلا حبيبتي ..
مريم: شلونك حبيبي ؟
خالد: الحمدلله .. شو تسوين ؟
مريم: ولا شي والله .. كنت اكلم فطيم اختي .. وتسلم عليك ..
خالد: الله يسلمها .. وينها من زمان ما شفتها ..
مريم: مشغوله ..
خالد: الريل خذ كل وقتها ..
مريم: هههههه ..
خالد: فديت هالضحكه والله ..
مريم: فديت روحك حبيبي ..
خالد: شو الغدا اليوم ؟
مريم: مادري ما شيكت والله ..
خالد: شو رايج امرج ونروح نتغدا برا ؟
مريم: مممممم .. زين حبيبي .. متى بتمرني ؟
خالد: 1 ونص بكون فالبيت .. اجهزي ..
مريم: ان شاءالله ..
سكرت من خالد وهي فرحانه .. تجهزت ونزلت تنتظر خالد فالصاله .. ساره شافتها متكشخه ..
ساره: على وين ؟
مريم: بروح اتغدى مع خالد ..
ساره: وين بتتغدون ؟
مريم: بنروح مطعم ايطالي جديد ..
ساره: بالعافيه ..
مريم: الله يعافيج ..
تمت مريم تلاعب عيال ساره لين خالد اتصل لها تلفون وطلعت له .. ركبت السياره وخالد مبتسم لها .. مسك يدها وباسها ..
خالد: شو اخبارج حياتي ؟
مريم مبتسمه: مشتاقه لك حياتي ..
خالد: فديت شوقج والله ..
مريم: زين بنتم في الحوش وايد ؟
خالد: هههههه .. لما تكونين قريبه مني .. انسى الدنيا ومافيها ..
مريم: فديت كلامك يا اغلى خالد ..
خالد: الله لا يحرمني هاللسان الحلو ..
مريم: ولا يحرمني منك ..
حرك خالد وتوجهوا للمطعم الايطالي .. تغدوا فيه وطلعوا يتمشون على البحر شوي .. رجعوا البيت على الساعه 4 خالد كان تعبان من الشغل ومصدع .. دخلوا الغرفه ومريم جهزت له ملابسه .. خذ له شور سريع واستلقى على الكرسي يقلب قنوات التلفزيون .. مريم قعدت عند ريوله وتمت تهمزه .. غط خالد من التعب .. مريم غطته وراحت طلعت لها كتاب تمت تقرى فيه لين الساعه 5 ونص .. دخلت خذت لها شور وطلعت قعدت خالد من النوم عشان الصلاه ..
مريم: خالد .. خالد حبيبي يلا قوم ..
خالد: هممممم ..
مريم: قوم حبيبي بيأذن المغرب بعد شوي ..
خالد: ان شاءالله ..
راحت مريم عند التسريحه .. فتحت شعرها وتمت تمشطه وهي مجابله المرايه .. خالد فتح عيونه وشاف مريم وهي تمشط شعرها .. وفجأه شاف شعرها يطول ويطول وهي تمشطه .. كل ما مشطته يطول لين وصل الارض .. التفتت عليه مبتسمه .. وخالد بطل عيونه يطالعها .. مريم كانت حاطه شعرها على كتوفها وتمشطه .. وكل شوي يطول وكانت لما تمشطه يدها تطول وتوصل لين الارض وهي تمشطه ..
مريم مبتسمه: شو فيك حبيبي ..
خالد قام من الكرسي ومشى متجه لها وهو متخرع ..
خالد: هاي انتي ..
مريم: خالد شوفيك ؟
خالد: خليني اعيش حياتي معاها ..
مرم: من هاذي ؟
خالد بصراخ: انتي ..
مريم بخوف: خالد شو فيك ..
خالد التفت وراه: مريم ..
مريم: من تكلم خالد ؟
خالد طوق ويهه بيدينه وغمض عيونه ..
مريم: خالد حبيبي شو فيك ؟
خالد: ولا شي فديتج .. حلم مزعج ..
مريم " شو هالحلم اللي خلاك تقوم من مكانك؟! "
مريم: سمالله عليك حبيبي .. تعال ارتاح على السرير فديتك ..
مشى خالد مع مريم وانسدح على السرير .. تم يفكر في مريم وكان خايف عليها .. تمت مريم تقرى عليه وتمسح على راسه ..
مريم مبتسمه: قوم حبيبي توضأ بيأذن ..
خالد: ان شاءالله حياتي ..
خالد راح المسيد وهو يفكر في مريم وخايف عليها ..
خالد " الله يحفظ مريم منها بس" ..
...............
يتبع