يوسف عقد حواجبه: بتروحون امريكا ؟


ريما: لا .. بنروح المكسيك ..


يوسف: حلاته والله ..


ريما: ها ؟


يوسف: ولا شي ..


الجوهره وفاطمه ضحكوا على ريما ويوسف ..


ريما: ليش تضحكون ؟


الجوهره: لان يوسف يضحك لما يلعوزج ..


ريما: انا بعد احب العوزه ..


الجوهره: متى بتسافرون ؟


ريما: بعد ما اخلص المدرسه .. ما بقى شي .. بس انا سمعت بابا يقول حق uncle S .. يمكن نقعد هناك على طول


يوسف: ها .. شلون على طول ؟


ريما: بابا قال جي ..


الجوهره ويوسف طالعوا بعض باستغراب ..


يوسف: ريما انتي متأكده ؟


ريما: بابا اللي قال ..


يوسف سكت وتم يفكر في كلام ريما .. التفت على فاطمه ..


يوسف: فاطمه ..


فاطمه: لبيه ..


يوسف: ابي ماي فديتج ..


فاطمه: ان شاءالله ..


طلعت فاطمه من الصاله رايحه المطبخ تجيب ماي لزوجها .. سلمان كان واقف عند باب المطبخ يراقب فاطمه .. تنهد ونزل راسه راح الصاله .. سلم عليهم وريما ركضت ناحيته وحضنته .. شلها سلمان وباسها .. قعد جنب الجوهره وريما في حضنه ..


سلمان: شخباركم ؟


الجوهره: الحمدلله ..


يوسف: وينك ما تبين يا خالي ..


سلمان: لاهي مع هالشغل والمحل ..


يوسف: يعطيك العافيه ..


دخلت فاطمه بكل هدوء .. سلمت وعطت يوسف الماي وقعدت جنبه .. خذت لولو من عند الجوهره وتمت تلاعبها بحنان ..


الجوهره: يلا يوسف نبي نشوف عيالك ..


فاطمه رفعت راسها وابتسمت للجوهره ..


يوسف: الله كريم .. ريما شاسمي بنتي ؟


ريما: اكيد ريما ..
يوسف: وع من زين اسمج ..


ريما: بابا شوفه .. يقول اسمي مب حلو


سلمان: ههههه .. ما عليج منه انتي اسمج احلى من اسمه ..


يوسف: يسمح امرك .. انا اسمي حلو وشكلي احلى بعد ..


الجوهره: يا مغرور ..


يوسف: يحق لي اغتر .. من حسن يوسف خذت اوصاف الجمال .. حد ينكر هالشي ..


سلمان والجوهره وفاطمه ضحكوا على كلام يوسف ..