هنادي تلطف الجو: ريما .. عميمه جوجو تقولج بكره بنطلع كلنا مع بعض ..
ريما ببرأه: يااااااي ..
يوسف سحب ريما من حضن فاطمه وقعدها بحضنه ..
يوسف بصراخ: ريماااا .. ريماااا ..
ريما طالعته باستغراب: انا هني ..
يوسف: ريما وينج ريما ..
ريما عقدت حواجبها: انا هني شفيك ..
مسكت ويهه وقربت ويها من ويهه: انا هني شوفني ..
يوسف بعبط: اوه انتي هني ريما .. تصدقين ما كنت اقدر اشوفج من كشتج ..
هنادي وسلمان: هههههههه ..
فاطمه ضحكت بهدوء وانخشت ورا يوسف وتمت تضحك .. سلمان عجبته حركة فاطمه .. تم يطالعها وصد ..


ريما: ترا انا ما ضحكت ..
يوسف بصراخ: اموت فالعبيطه ريما ..
ريما: الحين انت تقول انا ام كشه .. وبعدين تقول عبيطه .. انا اي وحده فيهم ؟
سلمان: هههاااااي .. مات من الضحك على رد بنته .. عرفتك يبه ..
هنادي: راحت عليك ..
الكل: هههههههه ..
ريما قامت من حضن يوسف وقعدت جنب ابوها وحضنته ..
ريما: احبك بابا ..
سلمان مسح على راسها: فديت قلبج انتي ..
هنادي: زين يا جماعه استأذنكم ..
يوسف: وين اختي ؟
هنادي: نواف تحت ..
فاطمه: بدري ..
هنادي: لازم اجهز شنطته بيسافر بكره ..
سلمان عقد حواجبه: وين بيروح ؟
هنادي: قريب .. بيروح الصبح وبيرجع فالليل ..
يوسف: اهاا ..
سلمان: يلا بنزل معاج وبسلم عليه ..
ريما بدلع: بابا شلني ..
سلمان مبتسم: تعالي امي وابوي انتي ..
هنادي: يلا خالي ..
سلمان: يلا ..
سلمت هنادي على فاطمه ويوسف ونزلت مع خالها وريما ..
تم يوسف مع فاطمه .. انسدح يوسف على الكرسي وحط راسه بحضن فاطمه اللي تمت تلعب بشعره وتسولف معاه
فاطمه: شو سويت اليوم حبيبي ؟
يوسف: رحنا انا وعلي وبوسعود معرض سيارات ..
فاطمه: من يبي يشتري سياره ؟
يوسف: علي ولد عمج .. انتي شسويتي ؟
فاطمه: رحنا وشفنا البنت ..
يوسف مبتسم: والله .. من راح معاج ؟
فاطمه وهي تلعب بشعر يوسف: انا ويدتي .. وعمي وفارس ..
يوسف: اها .. شسويتوا ؟
فاطمه: رحنا بيتهم وطلعت امها تعرف يدتي وابوي .. وانا اعرف البنت ..
يوسف عقد حواجبه: شلون ؟
فاطمه: الله يسلمك طلعت ام البنت كان ابوي مالج عليها قبل ما ياخذ امي .. تم معاها كم شهر وبعدين انفصلوا .. ويدتي تعرفها لانها خطبتها حق ابوي .. والبنت طلعت معاي فالجامعه .. وتخيل اني كنت افكر اخطبها حق فارس اخوي ..
يوسف مبتسم: سبحان الله .. شوفي شلون الدنيا تقرب البعيد ..
فاطمه: اي والله .. بس البنت كاسره خاطري ..
يوسف: ليش ؟
فاطمه: احسها منحرجه مني ..
يوسف: عشان انج عرفتي ان اخوج يبيها ..
فاطمه: يعني .. تعرف انا اول ما شفت ناديتها باسمها وكنت فرحانه .. بس تعرف شعورها .. احسها خايفه انها طاحت من عيني .. والله بالعكس فرحت وايد يوم عرفت ان هالبنت اخوي يحبها .. لاني يوم تعرفت عليها فالجامعه حبيتها وحبيت كل شي فيها ما شاءالله عليها ..
يوسف: الله يوفق فارس ان شاءالله ..
فاطمه: ان شاءالله ..
يوسف: حبيبتي ..
فاطمه مبتسمه: عيونها ..
يوسف: فديت عيونها والله .. فديتج اخذي غترتي والزرار والقلم واذا ما عليج امر جهزي لي ملابسي فديت قلبج .. انا بانزل عند خالي شوي ..
فاطمه: ان شاءالله ..
يوسف قام من حضن فاطمه قرص خدودها وابتسم لها .. نزل عند خاله وفاطمه راحت تجهز ملابس ريلها ..
فارس ومحمد كانوا قاعدين فالشقه وفارس يقول لمحمد عن الاحداث اللي صارت ..
فارس بوناسه: حمودي .. طلعت صديقة خواتي ..
محمد: والله .. سبحان الله ..
فارس: وعجبني موقف فاطمه اختي .. كانت وايد فرحانه .. تدري شو قالت لي ..
محمد: شو ..
فارس: قالت لي انها كانت تبي تخطب لي مناف .. بس خبرك انا كنت اتهرب من موضوع الزواج ..
محمد: هههههه .. صدف جمعت خواتك بحبيبتك ..
فارس: اي والله ..
محمد: امك درت ؟