{ نهاية حبك إعدامي } رووووووووووعه

[رامون]

مرت الايام ويبقى الحال على ما هو عليه .. بدت دوامات المدارس والجامعه .. فارس منعزل عن اهله وكل حياته مناف وبس .. عبدالعزيز التهى مع الجامعه و تجهيزات العرس مع يوسف وباقي الشباب يوسف .. فاضل قرر انه يكمل دراسته برا .. اعتذر هالكورس ووسحب اوراقه معد ما جاه القبول .. علي بدى دوامه مع دوام المدارس .. سلطان واحمد وجاسم شروا لهم دراجات وكل يوم والثاني راحوا العزبه .. سلمان دخل ريما المدرسه وارتاح لما قبلوها .. تفرغ للمحل اللي فتحه .. ام فارس تمارس حياتها طبيعيه وتكابر جدام الكل .. بس قلبها محترق على ولدها فارس .. فقدته لان لها فتره ما شافته ولا كلمته .. بوفارس ماقدر اقول عنه شي لان الغموض يحيطه من كل صوب .. شلون عرف عن علاقة فارس بمناف واهلها .. وشو السر اللي مخليه يتأكد ان فارس ما راح ياخذ مناف وشو سر سكوته .. مريم وخالد سافروا ماليزيا وقضوا احلى ايام حياتهم هناك .. خالد حب انه ينسي مريم همومها وهمومه .. في خلال فترة سفرهم وكل محمد وعلي انهم يجهزن له الشقه بعد ما اختار الاثاث هو ومريم .. رجعوا من السفر ونفسيتهم كانت غير .. والحين عايشين في شقتهم الصغيره اللي لامتهم .. محمد وساره حياتهم طبيبه ورجعت نفس قبل .. ساره تغيرت للأحسن ومحمد تغير وايد .. اما الريم المسكينه اللي تغيرت وكان باين عليها .. ما كانت تاكل الا القليل .. ما تقعد مع اهلها وايد انعزلت عن الكل من حزنها بخبر زواج فارس اللي ما صارت فيه اي تطورات .. بومحمد كان قلق عليها ويحاتيها .. بس هي كانت اطمنه وما تبين جدامه شي .. الجوهره ولدت وجابت بنتوته صغيرونه وسمتها لولوه .. ابراهيم فرح بالبنت وحبها وايد .. والحين عمرها كم اسبوع بس ..
قرب يوم فاطمه ويوسف .. ما بقى على العرس الا 15 يوم .. كان الكورس على آخره وفاطمه كانت تقدم آخر امتحان .. تلاقت هي ومناف ومريم ولطيفه فالكفتريا ..
فاطمه: واخيرا خلصت ..
مناف مبتسمه: تستاهلين .. بس زين سويتي هالكورس ماخذتي ساعات وايد ..
مريم: ما عليج منها مسويه حسابها ..
لطيفه: حاسبتها صح ..
فاطمه: يمه من عيونكم ..
الكل: ههههههه ..
مناف: والله اريح لج ..
فاطمه: اي والله .. تدرين ما بقى شي على يوم العرس وابي اتهيء نفسيا قبلها بفتره ..
لطيفه: عدل كلامج ..
مناف: الله يوفقج فديتج ..
فاطمه مبتسمه: وياج حبيبتي .. والفال لج ..
لطيفه ومريم: آآمين ..
مناف ابتسمت لهم وكانت تفكر في فارس ..
مناف " فديتك يا فارس .. ليش طالت السالفه ؟ " ..
مناف شافت ساعتها: اوه تأخرت على المحاضره ..
مريم: اي محاضره ؟
مناف: هالمحاضره الدكتور بيلخص لنا فيها الكتاب حق الامتحان ..
مريم: اها ..
لطيفه: خلج من سوالفهم روحي لحقي على محاضرتج ..
مناف مبتسمه: مع السلامه بنات ..
البنات: الله وياج ..
راحت مناف بسرعه متجهه لقاعة المحاضره .. اول مادخلت انصدمت بالدكتور اللي قاعد ينتظر فالقاعه .. هي افتكرت انها غلطت فالقاعه وطلعت .. راحت صوب القاعه الثانيه وشافت دكتور ثاني يمتحن طالبات .. فتحت جدولها تتأكد واستغربت .. سمت بالرحمن ودخلت القاعه .. كان الدكتور حامد يراقبها وهي داخله .. طبعا من بعد ما رفضته مناف ما تواجهت معاه هالكورس الا اليوم .. كانت القاعه شبه خاليه من البنات .. قعدت على الكرسي اللي بالصف الثالث .. فتحت كتابها وحاولت انها تشغل نفسها فيه .. والدكتور حامد ماشل عينه من عليها .. اكتملت القاعه ودخلوا كل البنات .. تكلم الدكتور ..
حامد: السلام عليكم .. طبعا مستغربين وجودي .. بس لان دكتور الماده اعتذر و وكلني بمهمة تلخيص الماده معاكم لإمتحان الاسبوع الجاي .. طبعا ببدى معاكم التلخيص من الدروس الاخيره لين الدروس الاولى ..
مناف " اها .. يعني دكتور الماده ما بغى يعتذر الا على هالمحاضره المهمه .. الله يهديه بس " ..
تم الدكتور يلخص الماده والبنات متابعين معاه .. خلصت المحاضره ومناف كانت اول من ترك القاعه .. كانت حاسه بالتوتر والقلق .. الدكتور حامد طالها وهي طالعه بسرعه ومنزله راسها ..
حامد " الله على الخجل .. ماشاءالله عليها " ..
فاطمه رجعت البيت وكانت مرتاحه ان قدامها 15 يوم قبل اليوم الموعود .. كانت في غرفتها واطالع اغراضها وشنطها .. دخلت عليها عمتها هيا ..
فاطمه: هلا عميمه ..
هيا: فديت عروستنا الحلوه ..
فاطمه: حلاة دنياج عميمه ..
هيا: جهزتي كل شناطج ؟
فاطمه: اي ..
هيا: الاسبوع الجاي انا وامج بنروح نرتبهم لج فالغرفه ..
فاطمه: ماتقصرين عميمه ..
هيا: فديت قلبج انتي .. الفال ان شاءالله حق ايمان والريم فديتهم ..
فاطمه: آمين ..
هيا: الا فارس وينه ؟ صار لي كم يوم اجيكم ولا اشوفه ..
فاطمه توترت: فارس .. الله يخليج يا عميمه .. اذا احنا ماقمنا نشوفه هالايام ..
هيا: ليش شعنده ؟
فاطمه: لاهي مع اشغاله .. ويجهز مع يوسف وعبدالعزيز ..
هيا: فديت قلبه والله .. وحشني ..
فاطمه: ليش هو ما مركم ؟
هيا: بلا يمرنا فديته .. بس استغربت هاليومين من امركم ولا اشوفه ..
فاطمه: ما ينلام فديته مشغول ..
هيا: الله يعطيه الصحه والعافيه ..
فاطمه: آمين " آه لو تدرين بفارس يا عمتي " ..
هيا: اخبار القاعه والتجهيزات ؟
فاطمه: امي وانتي ما قصرتوا .. امس كلمتني مالت الطاولات تقول ان الكاسات اللي طلبتها وصلت ..
هيا: زين الحمدلله ..
فاطمه: لا ماشاءالله عليها هالبنت توقيتها مضبوط ..
هيا: حليلها والله .. في عرس مريم ما قصرت والله .. شفتي شلون رتبت لنا القاعه ونسقتها ..
فاطمه: عشان جي انا اخترتها ..
هيا: ان شاءالله نشوف قاعتج مثل ما تخيلناها وخططنا لها ..
فاطمه مبتسمه: ان شاءالله ..
تمت هيا مع فاطمه يسولفون عن امور العرس والتجهيزات ..
الساعه 4 العصر .. مناف كانت واقفه عند مواقف الباصات تنتظر الوقت يمر عشان ترجع البيت .. كانت تسولف مع فارس ..
مناف: وين بتروح حبيبي ؟
فارس: بروح عند يدتي ..
مناف: اشوفك هالكم يوم دوم عند يدتك ..
فارس: هي تتصلي عشان اقعد معاه ونحش في خلق الله ..
مناف: ههههه .. عليك سوالف
فارس: فديت هالضحكه يعلها دوم ..
مناف نزلت راسها وتكلمت بصوت واطي: حياتي والله ..
..................
يتبع

[رامون]

فارس: فديت همسج يا قلبه ..
مناف: تدري من كم يوم امي تسأل فيصل عنك ..
فارس مبتسم: والله .. شو سألته ؟
مناف: سألته عنك وعن اخبارك ..
فارس: اها .. حليلها عمتي .. اقصد امج ..
مناف انحرجت وسكتت ..
فارس: فديت قلبها الخجوله ..
مناف: زين حبيبي الباص وصل .. خل اروح لان البنات تجمعوا كلهم ..
فارس: تحملي على نفسج يا قلبه ..
مناف: ان شاءالله حبيبي ..
سكرت مناف من فارس وتوجهت للباص .. اما فارس فتوجه لبيت يده .. دخل الحوش وشاف سيارة عبدالعزيز .. نزل ودخل الصاله ولقى عبدالعزيز والجد واقفين جدام المرايه ويعدلون في غترهم ..
فارس: على وين ؟
الجد التفت بخوف: وجع يا فروس خرعتني .. على بالي ابوك ..
عبدالعزيز: صوتك نفس صوت ابوي ..
فارس: لا تغيرون الموضوع .. على وين هالحزه ؟
الجد: مالك خص ..
فارس: بل ..
عبدالعزيز: لقط ويهك ..
الجد: انت اصلا شو جايبك هالحزه ؟
فارس: نتفتني يا يدي ..
الجد: الناس ترتاح وتقيل .. وانت تناقز لي من مكان لي مكان .. ماعندك سالفه ..
دخلت عليهم الجده ..
الجده: دامك تقول هالكلام .. شو اللي مهيتك مع هالياهل عزوز ..
عبدالعزيز: بل ..
فارس بشماته: لقط ويهك ..
الجد: احنا عندنا شغل ريايل ..
الجده: لا صدقت شغل الريايل ..
فارس: اموت فيها والله ..
قرب من يدته وباس راسها ..
الجده: لا ومتدهن ومتدخن بالعود الزين .. شهالشغل ها .. علمني ..
الجد سحب عبدالعزيز: قم نروح عنهم .. اخوك ويه نحس علينا ..
الجده: ويهه نحس .. الا كشف فعايلك ..

الجد طلع و وراه عبدالعزيز وسكر الباب ..
فارس قرب من يدته وباس راسها مره ثانه بس سحب راسها بقوه ..


الجده: الله يلعن اليهود عورت راسي انت بعد ..


فارس: هههههه .. آمين ..


الجده: اقعد خل انادي الخدامه تجيب القهوه ..


فارس: ان شاءالله ..


راحت الجده المطبخ ورجعت مره ثانيه عند فارس فالصاله .. الخدامه حطت القهوه وراحت .. الجده قلطت فارس وصبت له القهوه وقدمت له التمر .. فارس تم يسولف معاها شوي وبعدين هي فتحت معاه موضوع العرس ..


الجده: شو صار على موضوع خطوبتك ؟


فارس: ولا شي ..


الجده: شوله ؟


فارس خذ نفس: آآآه .. والله ماعرف شو اقولج يدتي ..


الجده عقدت حواجبها: شو فيك يبه .. ليش الحزن بصوتك ؟


فارس: يدتي .. امي رافضه البنت ..


الجده تخصرت: ويه .. ليش زين ؟


فارس: امي تقول ان هالبنت مو من ثوبنا ..


الجده: يعل ثوب امك الشق .. شو هالكلام بعد ..


فارس: انا سكت عن الموضوع الحين عشان عرس فطيم .. ولا كلمت حد فالموضوع ..


الجده: بس ابوك قالنا من زمان عن هالموضوع ولا شفنا اي رد ..


فارس: اي الموضوع من زمان صاير .. والرد جاني على طول من امي .. بس انا ما حبيت اناقش امي فالموضوع


الجده: شو بعد اناقش ؟ تكلم عربي ..


فارس: هههههه .. يمه انا اتكلم عربي .. اناقش يعني اتكلم فالموضوع ..


الجده: قصدك تشوف رايي امك بالموضوع ؟


فارس: ايوه عليج نور ..


الجده: زين .. قولي امك سألت عن البنت واهلها ؟


فارس: اي سألت و بلسانها قالت لي ان البنت ما عليها كلام واهلها الكل مدح فيهم .. بس ما رضت فيها عشانهم على قد حالهم ..


الجده: هاي مب عذر .. وامك ذي بسنعها ..


فارس: بس يدتي طلبتج ..


الجده: قول ابوي انته ..


فارس: لا تكلمين حد فهالموضوع الحين ..


الجده: شوله ؟


فارس: مابي اسوي مشاكل .. ومابقى شي على عرس فطيم .. عقب العرس بنقعد ونتكلم ..


الجده: عيوني لك ..


فارس مبتسم: تسلم لي عيونك ..


الجده: الا بسألك ..


فارس: هلا ..


الجده: انت تعرف هالبنت ؟


فارس ويهه صار احمر: ها .. لا ماعرفها يدتي .. بس شفتها كم مره وعجبتني .. مأدبه ومحتشمه و حلوه بعد ..


الجده تلعوز فارس: علينا هالكلام .. شفتها برا .. يبه انت من يرن تلفونك انخطف لونك .. تقولي شايفها برا ..


فارس ضحك باحراج: لا شدعوه ..


الجده: هات من الآخر يالعفريت ..


فارس: هههههه .. صدقيني ماعرفها ..


الجده: ما تقص علي انا ..


فارس يغير الموضوع: تدرين يدتي ..


الجده: قول ابوي ..


فارس: انا مستغرب من ابوي ..


الجده: شو فيه ابوك ؟


فارس: ما كلم امي فالموضوع واحس في قلبه كلام ..


الجده: امس الظهر ابوك عندي ما شفت عليه شي ..

فارس: هو جاني وقالي ان امي مب راضيه .. وبعدين كان بيقولي شي ثاني بس سكت بدخلت امي علينا .. وللحين ماقدرت اكلمه واعرف منه شي .. احسه يتهرب مني ..


الجده: ضيعتني يا صبي .. شو يعني يتهرب منك ؟


فارس: هههههه .. يعني يتصدد ما يبي يكلمني ..


الجده تفكر: همممممم .. ابوك مقدور عليه بصيده لك اليوم ولا بكره لي مر علي .. بس امك بسنعها عقب العرس .. على بالك باسكت عن كلامها اللي ماله معنى .. اي والله مب من ثوبنا ..


فارس: يدتي شو قلت لج من شوي ..


الجده: شو ؟


فارس: لا تفتحين الموضوع مع اي حد الا بعد عرس فطيم الله يخليج ..


الجده: اوهو .. شغلت قلبي وقهرتني وتبيني اسكت ..


فارس: عشان خاطري ..


الجده: ولا يهمك .. عقب عرس اختك بمسك امك وابوك وبعقد معاهم ..


فارس: عفيه يدتي والله ..


الجده: زين اشرب هالفنيال ..


فارس: بسي والله اكتفيت ..


الجده: انت شلون صاير كلامك بعد ؟


فارس باستغراب: اي كلام يدتي ؟


الجده الا اناقش .. ولا اكتفيت .. يبه تكلم عدل ..


فارس: انا اتكلم عدل .. بس انتي مال اول شعرفج ..


الجده: وجع يا فروس .. اركد لا اكسر هالدله على راسك ..


فارس: هههههه .. زين زين ..


رن جوال فارس وكانت الرنه عالي مستواه .. على طول كتم الرنه و حط التلفون على جنب .. الجده تمت اطالع فارس بتحدي ..


الجده: رد .. ليش سكرت ؟


فارس: احم .. لا هم سكروا بسرعه ..


الجده: وليش يسكرون بسرعه ؟


فارس: يلعوزوني ..


الجده: من هذول اللي يلعوزونك ؟


فارس: الربع ..


الجده: فروس هات من الآخر احسن لك ..


فارس يضحك: هههههه .. شو تبين اقولج يدتي ..


الجده: انت على بالك صدقتك يوم تقول انك شايفها .. انا اقطع يدي اذا انت مب عاشقها ..


فارس: شو فيها لو عشقت ؟


الجده: اعشق يبه محد قالك ما تعشق .. دام القلب اختار .. اعشق وحب ..


فارس: الله على كلامج اللي يبرد الخاطر يا يدتي ..


الجده: زين قولي انت تحبها ؟


فارس مبتسم: لا .. بس شاريها ..


الجده " راسه يابس مب راضي يتكلم "


الجده: بعد عرس اختك بتنحل الامور بأذن الله ..


فارس عض شفته " آمسن " ..


فارس: زين الغاليه انا اترخص الحين ..


الجده: بتروح الحين .. كلهم بعد شوي بيجون اقعد زين ..


فارس: عندي شغل ضروري .. وبعد شوي بيأذن بصلي فالمسيد ..


الجده: زين روح صل وتعال ..


فارس: عندي شغل .. بمرج وقت ثاني ان شاءالله ..


الجده: ما يندرى شو هالشغل ..


فارس ابتسم لها .. قرب منها وباسها على راسها وطلع .. الجده كانت تفكر في فارس وتعلقه فالبنت اللي يبغيها ..
...................
يتبع

[رامون]

فارس: شو اخباركم مع المدارس؟


عبدالله: وناسه ..


فيصل: ملل ..


فارس: ليش ملل ؟


فيصل: دراسه و واجبات ..


فارس: هههههه .. توك بأول المشوار ..


فيصل: ادري ..


فارس: جدامك درب ..


عبدالله: وانا ؟


فيصل بعصبيه: عبود يالملقوف اسكت ..


عبدالله طالع اخوه باحراج وامتلت عيونه بالدموع .. نزل راسه وتم يشبك اصابعه ببعض .. فارس استغرب من اسلوب فيصل الجاف مع اخوه .. حب انه يغير الجو شوي ..


فارس: شو رايكم نروح العزبه نهاية هالاسبوع ؟


عبدالله ببرأه: الله وناسه .. اي خل نروح ..


فيصل: اي وناسه ..


فارس: خلاص ان شاءالله بنروح والشباب كلهم بيكونون هناك ..


عبدالله: علي بعد بيجي ؟


فارس مبتسم: اي لازم ..


عبدالله: الله بنركب البانشي ؟


فارس: ان شاءالله ..


فيصل: احمد وسلطان وجاسم بيجون بعد ؟


فارس: هذول اول ناس هناك ..


فيصل: احلى شي والله ..


فارس: اول ما ترجع البيت كلم امك و استأذن منها ..


فيصل: ان شاءالله ..


وصل طلبهم وكل منهم كل بهدوء وأدب .. خلصوا وفارس وصلهم البيت .. فالدرب عبدالله نام .. فارس استغل الفرصه وتكلم مع فيصل ..


فارس: فيصل ..


فيصل مبتسم: هلا ..


فارس: شو فيك ؟


فيصل: مافيني شي ..


فارس: ليش صاير عصبي جي ؟ ماخبرك تزف عبود جي ولا تفشله جي ؟


فيصل نزل راسه: مسكين عبود يكسر الخاطر ..


فارس: ليش ؟


فيصل: ازفه ولا يزعل مني ..


فارس: بس انت ليش تسوي جي ؟ شو اللي مضايقك ؟


فيصل: ولا شي ..


سكت فيصل والتفت صوب الدريشه .. فارس سكت عنه وخلاه على راحته .. فيصل خذ نفس عميق والتفت على فارس ..


فيصل: فارس ممكن آخذ رايك بشي ؟


فارس: تفضل ..


فيصل: انت اكبر اخوانك صح ؟


فارس مستغرب: اي نعم انا اكبرهم ..


فيصل: زين تخيل ان عندك اخت اكبر منك وتحترمها وايد ..


فارس: زين ..


فيصل: تخيل انك في يوم شفتها تتكلم فالتلفون فالليل .. شبتسوي ؟


فارس دارت فيه الدنيا من سمع هالكلام .. تلخبط وماعرف يرد على فيصل .. تم ساكت فتره .. والافكار تروح وتجي عليه ..


فارس: متى فالليل يعني ؟


فيصل: وقت متأخر يعني الساعه 1 فالليل ؟


فارس بتوتر: مممممم .. اول شي لازم احكم عقلي ..


فيصل يقاطعه: لحظه ما فهمت قصدي ..


فارس: تفضل قول ..


فيصل: يعني اختك تكون اكبر منك بوايد .. وماتقدر تقولها شي لانك اصغر منها .. بس تنصدم انها تتكلم فالليل بالتلفون ..


فارس زاد توتره وحس انه مايشوف الشارع جدامه ..


فارس: والله اول شي ما بفكر في اختي تفكير سيء ..


فيصل: شلون ؟


فارس: يعني لو اني شفتها تتكلم فالليل ما بقول تكلم واحد .. لازم احط احتمالات و احسن النيه ..


فيصل: زين شلون ..


فارس: اختي اللي اكبر مني اكيد بحترمها .. اول شي اسويه اني اكلمها بكل هدوء .. اقولها والله يا فلانه انا شفتج تتكلمين فالتلفون فالليل .. واستغربت من هالمكالمه .. شو سببها وهل كانت ضروريه بحيث انج تكلمتي هالوقت ؟ انتظر ردها وبردها اقرر شو بسوي ..

فيصل: زين لو كذبت عليك ؟


فارس: دام انا اعرف اختي واعرف تربيتها بعرف لو كذبت او لأ ..


فيصل سكت مره ثانيه وصد صوب الدريشه .. فارس تم يفكر ويحاتي ..


فارس: زين ليش سألتني هالسؤال يا فيصل ؟


فيصل: ها .. لا واحد من ربعي صارت له هالسالفه وسألني شيسوي .. عاد انت اخوي الكبير وانا احب اقلدك في كل شي .. فقلت اسألك لانك عاقل وتعرف تتصرف ..


فارس تنفس بعمق: زين رفيجك ذي شو اللي صار له بالضبط .. ممكن اعرف ؟


فيصل: زين بس هالكلام بينا ..


فارس: ان شاءالله ..


فيصل: رفيجي يقول انه مره قعد من النوم فالليل وكان يبي الحمام .. وهو مار صوب غرفة اخته سمعها تتكلم فالتلفون وتضحك ..


فارس: زين ..


فيصل: وانصدم ..


فارس: زين شو اللي فكر فيه رفيج في ذيك اللحظه . ؟


فيصل: فكر اخته من تكلم هالوقت .. وهي نادر ما تتكلم فالتلفون طول اليوم .. ليش يعني تكلمت هالوقت ؟


فارس: زين يمكن كانت مكالمه ضروريه .. ليش رفيجك ما فكر بهالشي ؟


فيصل: يعني تعرف انا ريال .. اقصد رفيجي ريال .. واول شي بيجي في باله في هالموقف انها تكلم واحد هالوقت ..


فارس " ماشاءالله عليك يا فيصل " ..


فارس: مو كل الريايل يفكرون جي ..


فيصل: شلون ؟

فارس: يعني انا لو سمعت او شفت اختي تتكلم هالوقت ما راح افكر في شي سيء هاي اول شي .. وماراح ادخل عليها اسألها من تكلمين ..


فيصل: ليش ؟


فارس: لاني اعرف تربيتها وانا واثق فيها ..
.................
يتبع

[رامون]

فيصل اقتنع بكلام فارس ..


فارس: لازم تصفي النيه يا فيصل .. بس بسألك سؤال ..


فيصل: تفضل ..


فارس: رفيجك سمع اخته تتكلم فالتلفون مره ثانيه ؟


فيصل: لا بس هاي المره الوحيده ..


فارس: ومن متى صايره هالسالفه حق رفيجك ؟


فيصل: هالسالفه لها كم اسبوع ..


فارس: اها .. شوف دام ما شاف شي عليها لازم ما يشك .. وبعدين لو تكرر هالموقف خله يتشجع ويكلمها ..


فيصل: بس هو اصغر منها بواليد هو قدي وهي تقريبا 20 عمرها ..


فارس: بعد ما يمنع انه يكلمها ..


فيصل: مممممم .. زين بس هو حس بأحساس غريب ناحيتها ..


فارس: شلون ؟


فيصل: يعني هي اكبر منه ودوم يشوفها قدوه له .. يحس كأنها طاحت من عيونه ..


فارس " هاي اللي كنت خايف منه " ..


فارس: يعني تحس ان صورتها اهتزت جدامك صح ..


فيصل: لا هي ما طاحت من عيوني .. اقصد من عيونه بس يعني نفس اللي زعل عليها ..


فارس: فاهم قصدك .. رفيجك وايد حساس .. بقولك عنه شي ..


فيصل: زين ..


فارس: رفيجك ذي يحب اهله وايد .. ويخاف عليهم .. ويزعل لزعلهم .. ويحزن لحزنهم .. صح ..


فيصل باستغراب: عدل كلامك .. بس شلون عرفت ؟


فارس: من كلامك عنه ..


فيصل: اي ي ي ..


فارس: قوله دام امنه يحب اهله ويخاف عليهم خله يحافظ عليهم ويحكم عقله و يوزن الامور صح .. وما يتأخذ اي قرار من غير ما يفكر فيه عدل .. لا يقسى ولا يخلي مشاعره تتحكم فيه ..


فيصل: اها ..


فارس: قوله هالكلام ..


فيصل مبتسم: ان شاءالله ..


فيصل حط يده تحت خده وسرح وهو يطالع الدريشه .. فارس تم يفكر في كلام فيصل ونفسيته ..


فارس حط يده على شنبه " يعني فيصل شو ممكن سمع ؟ ايه عليج يا مناف فديت قلبج .. كله ولا اطيحين من عيون اخوانج .. لازم اكلمها وانبها " ..


وصلوا عند بيت مناف .. نزل فيصل وراح ينادي مناف عشان تشل عبدالله اللي كان نايم .. فارس شله و وقف ينتظر عند الباب ..


فيصل: مناف .. منااااف ..


مناف: شفيك تصرخ ..


فيصل: تعالي شلي عبود ..


مناف بتوتر: ها .. وينه ؟


فيصل: عند الريال ..
مناف " فديت الريال والله " ..
مناف: زين بس البس عبايتي وبجيك ..
فيصل: وين امي ؟
مناف: امي في غرفتها .. زين شرايك تقولها تاخذ عبود ؟
فيصل: بشوفها .. بس انتي تعرفين امي ريولها تعورها وبتقولج انتي ..
مناف: زين روح شوف امي اول ..
فيصل: زين زين ..
راح فيصل عند امه اللي كانت فالغرفه وماسكه ثياب نايف وتصيح .. وقف فيصل عند الباب متأثر بموقف امه .. اول مره يشوف امه بهالحاله .. نزل راسه وراح غرفة مناف ..
فيصل بحزن: يلا روحي جيبي عبود .. طولنا على الريال ..
مناف: وامي وينها ؟
فيصل: نايمه ..
مناف وهي تلبس عبايتها: ان شاءالله الحين بجيبه .. يلا تعال معاي انت بعد ..
فيصل: بروح اتطمن على امي زين ..
مناف بخوف: زين ..
لبست عبايتها بسرعه وراحت صوب الباب .. من ورا الباب وقفت اطالع فارس اللي كان شايل عبدالله ويتأمل ملامحه ومبتسم .. زادت دقات قلب مناف .. عدلت شيلتها وفتحت الباب .. فارس سمع صوت الباب ورفع راسه اول ما شاف مناف ابتسم لها بحزن .. مناف حست ان قلب فارس متروس .. تذكرت لما سكرت منه التلفون وهي زعلانه على مزحه .. مشت بخطوات بطيئه وعيونها فالارض .. اما فارس فكان يطالعها .. قربت منه و مدت يدها عشان تاخذ اخوها منه ..
فارس: فديت الدلوعه والله ..
مناف كانت منزله راسها ومنحرجه من فارس ..
فارس: يا قلبه ليش هالزعل .؟
مناف بصوت واطي: مب زعلانه ..
فارس مبتسم: اموت فالدلوعه انا .. حياتي والله ..
مناف ماتت من الخجل .. فارس قرب اخوها لها وشلته .. كانت منزله راسها من الخجل .. صدت بترجع البيت .. مشى فارس جنب مناف و وقف جدامها .. مناف خافت من حركة فارس .. خافت ان يطلع فيصل ولا امها ويشوفونهم .. ارتبكت مناف ..
مناف: فارس الله يخليك اخاف فيصل اخوي ولا امي يشوفونا ..
فارس قرب منها: خير يعني لو شافونا ؟
مناف بصوت واطي: ابيه .. الله يخليك خلني ادخل ..
فارس قرب ويهه من ويها: لا باخطفج يالدلوعه ..
مناف غرقت عيونها: لا فارس ارجوك ..
فارس يتكلم بجديه: سمعي اول ما تدخلين البيت اتصلي لي ضروري .. ابيج في موضوع مهم ..
مناف بخوف: شصاير ؟
فارس: انتي اتصلي وبقولج .. لا تتأخرين زين ..
مناف: ان شاءالله ..
مشى فارس جنب مناف وهو معديها من صوب اليسار ..و بيده اليمين مسح على ويهها .. مناف ارتبكت وكانت بطيح وهي تمشي .. فارس تركها وركب الرنج الاسود .. تم يراقبها وهي داخله .. كان قلبه يتقطع عليها ..
فارس " فديت قلبج يا مناف .. تلقينها من من ولا من .. امي ومعارضه زواجنا .. فيصل ومنصدم فيج .. فديت روحج .. متى اخطفج يا اميرتي الدلوعه يا احلى بنت فالعالم " ..
.....................